контактирајте нè

Еден од основните показатели дека може да се работи за цревна инфекција е пролив (диареа). Секако покрај него често присутни се повраќање и покачена телесна температура. Кога е во прашање бактериска цревна инфекција кај децата, тие имаат чести проливесто-течни столици, со многу непријатен мирис, а понекогаш можна е и појава на крв во столицата.

Како се поставува диагнозата?

- Кај дете кај кое постои сомнение за бактериска инфекција, се прави микробиолошки преглед на изметот (копрокултура), како би се открила точната причина за инфекцијата, би се изолирала бактеријата.

- Кај деца со покачена температура, обично се прави и крвна слика и ЦРП-како еден од показателите дека се работи за бактериска инфекција.

Лекување:

Кај голем дел од децата лекувањето оди со орална рехидратација (надополнување на течности кои најдобро е да се од електролитен тип.) Голема улога во третманот на бактериските инфекции има и адекватната диетална-антидијароицна диета (тоа подразбира лесна термички добро обработена храна која многу лесно се вари-ориз, морков,компир,со малку додаток на сол), која првите два дена мора да биде строга. Како постепено се нормализира столицата така се воведува и друга исхрана. Варено бело пилешко месо и телешка супа  се најдобар начин за вовед во ,,нормална исхрана”. Треба да се избегнува храна што содржи јаглени хидрати (тестенини, слатко, колачи..)

Кога да се даде антибиотик?

Кај претходно здрави деца, најчесто не е потребен антибиотик, поради тоа што самиот имун систем е доволен да сам се избори со голем дел од бактериските инфекции. Но, секако дека има состојби кога неговата употреба е сосема оправдана и неопходна;

- кај бебиња во првите месеци од животот, кои по правило се лекуваат во болница;

- во случај кога општата состојба на детето не е добра: малаксалост, болки во стомакот, поспаност, повеќе течни столици, дехидратација, покачена температура.

Она што посебно би сакала да го потенцирам е тоа дека во случај на цревни инфекции употребата на пробиотик е ислкучително важна и оправдана.Така внесуваме т.н.,,добри” бактерии со кои би го зајакнале цревниот имунитет, и директно би помогнале во побрза елиминација на причинителот на инфекцијата.

Истите може да се даваат и подолг временски период по завршување на инфекцијата.

Автор на текстот:

Спец. педијатар
Др.Моника Топузовска

Превземено од www.bebeboom.mk